Ils 23 da settember 1524 ei vegniu suttascret a Glion il patg per la fundaziun dil stadi liber dallas Treis Ligias. Cun quell’allianza han la Ligia Sura (pli tard Ligia Grischa), la Ligia dalla Cadadiu e la Ligia dallas Diesch Dertgiras tschentau il fundament pil cantun Grischun d’ozildi.
Ella republica grischuna eran ils Bundstags (ni era «Puntstag») las pli impurtontas reuniuns politicas. Ils dellegai s’entupavan en in turnus regular era a Glion, il liug dalla fundaziun dil stadi liber ch’era medemamein era il liug principal dalla Ligia Grischa.
500 onns pli tard – igl 1. e 2 da zercladur 2024 vegn festivau danovamein in Bundstag a Glion! Il marcau seprepara sin ina fin d’jamna plein festivitads. Ina inscenaziun el liber, exposiziuns attractivas, ina fiera multifara, in til festiv, musica e bia auter spetga hosps ed indigens. E duront ch’il passau vegn festivaus dil taliter, reflectein nus era il present ed il futur, sco p.ex. la cuminonza dalla vischnaunca Ilanz/Glion ch’ei fusiunada dapi 10 onns.
„Far punts“ ei lu era il motto dils responsabels pil project pil Bundstag a Glion – igl emprem marcau spel Rein cun sia punt ch’era inaga in punct strategic pil traffic. Ei duei vegnir «fatg punts» denter epocas e generaziuns, denton era denter las fracziuns dalla vischnaunca fusiunada Ilanz/Glion e sias habitontas e ses habitonts.
Dapli tier las festivitads Bundstag a Glion
Uniun «Festkomitee Bundstag Ilanz» c/o Museum Regiunal Surselva Dr. Ursina Jecklin Candrian Städtlistrasse 10 7130 Glion
+41 81 925 41 81 ursina.jecklin@museumregiunal.ch
