Sin il santeri s. Martin a Glion ei ina fossa steila vegnida creada. Quella porscha in niev liug da sentupada e da refugi. In liug nua ch'ins sa semplamein esser, anflar tier il ruaus intern, patertgar ed in liug, nua ch'era affons san sesentir bein. Il santeri natiral cun la baselgia s. Martin ei in liug quiet, meditativ e porscha in spazi adattau per la fossa steila.
El temps da purtonza e medemamein da vegnir geniturs, crescha ina ferma relaziun cun in niev tut unic. Spitgar in affon ei aschi excepziunal e profund en mintga fasa dalla veta. Tuttenina sa ei schabegiar ch'ina gravidonza vegn interrutta abruptamein. La spiarsa dolurusa d'in affon buca naschiu sa caschunar gronda tristezia ed in sentiment da vitadad per ils geniturs. La fossa steila ei in liug nua che la regurdientscha vid quei mument dalla spiarsa anfla siu dacasa terrester.
Tier la fossa steila Ilanz/Glion ein novs spazis vegni creai cun plattas da crap indigenas. Plattas pintgas e grondas ein vegnidas unidas sidretg e schischent. Quellas plattas fuorman in spazi. Fessas fuorman las entradas ed extradas. Igl interiur daventa in liug zuppau. Il plantschiu ei curclaus cun plattas da crap finas. Sia cumparsa fuorma in teppi misterius. Ordeifer ils spazis da crap prosperescha il verd.
La fossa steila dat a mintga affon (da 0 entochen 7 onns) siu plaz tscharniu dils geniturs ni era d'ulteriurs confamigliars. Leu sa vegnir mess in crap pign indigen cun colur e fuorma speciala en ina dallas plattas da crap. Mintgin dils craps ei unics en sia colur ed el medem mument stattan els sco pintgas steilas glischontas en quei spazi zuppau dalla fossa steila.
La fossa steila Ilanz/Glion ei aviarta per tut ils affons steila dalla Surselva.
